দুখৰ বিলাপ

         ------------------
         (১)
ফেঁহুজালিতে ছিঁ ছিঁয়াই
এহালি এমাডিমা শালিকী
দেহি ঐ ওঁঠযোৰ কঁপি আছে
জাগলপতা বৰষুণ ওৰেটো ৰাতি
জুপুৰিত একাঠু পানী ।

    (২)

বাওধানৰ সজালতা
বিৰিশ বগাব খোজে ,

ৰাতিবোৰ দেওলগা
পপীয়া তৰাটি হৈ নিশাটোতে বাগৰি
দেহৰ প্ৰতিটো ভাঁজ কোঙা

বিষে কোপে জাৰে জহে
টঙীঘৰে মুখ মেলি চালে
হুৰ হুৰ বতাহ চৰাই ।

      (৩)
আবেগৰ আবুৰসনা পুৱাটো
চিলা হৈ উৰি গ'ল
কোন দিশে নাজানো

কুৰুৱা পখীৰ পাখিৰ ঢপঢপনি
পূব আৰু পশ্চিম ,উত্তৰ আৰু দক্ষিণ

সুৰ এটি বাজি থাকিল
নিষাদ গান্ধাৰ ৰাগৰ তানত
    বিষাদৰ ।